აბაშის მუნიციპალიტეტის გერბი წარმოადგენს:
გერბის ფარი გადაკვეთილია და ქვემოთ გაკვეთილი იყოფა სამ ნაწილად: I ნაწილი – ვერცხლის ველზე ლაჟვარდის ხმალი, რომლის ზემოთ მოთავსებულია მეწამული ჰერალდიკური ჯვარი; II ნაწილი – ლაჟვარდის ველზე ოქროს საწმისი; III ნაწილი – მწვანე ველზე ხუთი ოქროს თავთავი. მწვანე ველს ზემოთ და ქვემოთ კვეთს სამი შემცირებული, ტალღოვანი ვერცხლის სარტყელი.
გერბის ფარს ზემოთ მოთავსებულია საქალაქო ვერცხლის გვირგვინი – სამკოშკიანი, ქონგურებიანი გალავანი (ციხე–სიმაგრის ფორმის) ნახევრად ღია ჭიშკრით.
ფარს ქვემოთ მოთავსებულია დევიზის ვერცხლ–ლაჟვარდ ბაფთა, რომლის ვერცხლის ველზე შავით ჩაწერილია გერბის დევიზი „აბაშა“.
აბაშის მუნიციპალიტეტის დროშა წარმოადგენს:
დროშა ვერტიკალურადაა გაყოფილი სამ ნაწილად. დროშის პირველი ნაწილი წარმოადგენს ლაჟვარდის ველს და უჭირავს დროშის სიგანის 1/5. მეორე ნაწილი (დროშის ცენტრალური ნაწილი) წარმოადგენს თეთრ ველს, რომელზეც გამოსახულია მეწამული ვარსკვლავი და უჭირავს დროშის სიგანის 3/5. მესამე ნაწილი წარმოადგენს მწვანე ველს და უჭირავს დროშის სიგანის 1/5.
დროშის პროპორციაა 2/3.
