აბაშის მუნიციპალიტეტის მერი, გიგა გაბელაია, ცნობილ პიანისტს, ხელოვნების აკადემიის რექტორს, პიანისტთა ეროვნული და საერთაშორისო კონკურსების დამაარსებელს, ვალერიან შიუკაშვილს შეხვდა.
საპატიო სტუმარმა, მადლიერება გამოთქვა მუნიციპალიტეტის მერიის მხარდაჭერით, ხელოვნების სკოლის სხვადასხვა კონკურს-ფესტივალში მონაწილეობისთვის, ასევე მადლობა გადაუხადა ხელოვნების სკოლის პედაგოგებს, მოსწავლეებს დაუღალავი შრომისა და მუსიკის ესოდენ დიდი სიყვარულისათვის.
ვალერიან შიუკაშვილის მიერ დაარსებულ სხვადასხვა კონკურსში აბაშის ხელოვნების სკოლის მოსწავლეები აქტიურად მონაწილეობენ. აღნიშნულმა პროექტებმა არაერთი უნიჭიერესი მუსიკოსი, შემოქმედებითი ჯგუფი და საგუნდო კოლექტივი გამოავლინა.
აბაშის მუნიციპალიტეტის მერმა, გიგა გაბელაიამ, პიანისტს, ვალერიან შიუკაშვილს სიმბოლური საჩუქარი, აბაშელი ხელოვანის, მხატვართა კავშირის წევრის, ალექსანდრე (ზენერ) ჩაგანავას მიერ შესრულებული ჭედურობა- „მუსიკის ჰანგები“ გადასცა.
პიანისტმა მარნის ახლად რეაბილიტირებული კულტურის სახლი დაათვალიერა, ასევე ესტუმრა ხელოვნების სკოლას, სადაც შეხვდა პედაგოგებს, მოსწავლეებს. სტუმარმა ხელოვნების სკოლაში რამდენიმე საფორტეპიანო ნაწარმოები შეასრულა.
