1989 წლის 9 აპრილს დატრიალებული ტრაგედიიდან 32 წელი გავიდა

1989 წლის 9 აპრილს დატრიალებული ტრაგედიიდან 32 წელი გავიდა. ქართველმა ერმა თამამად გამოხატა სწრაფვა თავისუფლებისა და დამოუკიდებლობისაკენ, ამ დღეს დაიღვარა სამშობლოსათვის თავგანწირულ მამულიშვილთა სისხლი.
აბაშის მუნიციპალიტეტის მერმა, ლევან მაკალათიამ, საკრებულოს თავმჯდომარესთან, მამუკა კვიტაშვილთან ერთად პატივი მიაგო 9 აპრილის ტრაგედიისას დაღუპულთა ხსოვნას და მემორიალი ყვავილებით შეამკო.
მუნიციპალიტეტის ხელმძღვანელებთან ერთად, 9 აპრილის გმირების ხსოვნას პატივი მიაგეს: მოქანდაკემ, ზენერ ჩაგანავამ, მერიისა და საკრებულოს თანამშრომლებმა, საზოგადოებრივი მოძრაობა „ეროვნულების“ წევრებმა.
დაღუპულთა სულის მოსახსენიებელი პანაშვიდი გადაიხადა დეკანოზმა კონსტანტინე კაჭარავამ.
საქართველოს ისტორიაში 9 აპრილი ორ მნიშვნელოვან თარიღს უკავშირდება_1989 წლის ტრაგედიასა და დამოუკიდებლობის აღდგენას 1991 წელს.
1989 წლის 9 აპრილს, საბჭოთა კავშირის სადამსჯელო სამხედრო ნაწილებმა მშვიდობიანი საპროტესტო აქცია დაარბიეს, რის შედეგადაც 21 უდანაშაულო ადამიანი დაიღუპა.
9 აპრილიდან ზუსტად ორი წლისთავზე, საქართველოს რესპუბლიკის უზენაესმა საბჭომ, ზვიად გამსახურდიას მეთაურობით საქართველოს დამოუკიდებლობის აღდგენის აქტი მიიღო.