აბაშის მუნიციპალიტეტი მესამე დღეა სტიქიას ებრძვის.
ძლიერი ქარის გამო მუნიციპალური სამსახურები საგანგებო რეჟიმში აგრძელებენ მუშაობას.
დაზიანებულია მუნიციპალიტეტის ინფრასტრუქტურა, ელექტრო გადამცემი სადენები და ბოძები, საცხოვრებელ სახლებზე გადახდილია სახურავები, მოგლეჯილია ხეები.
გვიან ღამით, ძლიერმა ქარმა აბაშის მუნიციპალიტეტის ქოლობნის ადმინისტრაციულ ერთეულში მცხოვრებ ჯამბულ დოლიძის საცხოვრებელი სახლი დააზიანა და ოჯახის ევაკუაცია გახდა საჭირო. ოპერატიული მოქმედების შედეგად, აბაშის მუნიციპალიტეტის მერმა, გიგა გაბელაიამ და მერიის შესაბამისმა სამსახურებმა სტიქიისგან დაზარალებული ოჯახი სასტუმროში დააბინავა.
წუხელ მთელი ღამის განმავლობაში მიმდინარეობდა და დღესაც გრძელდება წაქცეული ხეებისაგან ჩახერგილი გზების გაწმენდა.
აბაშის მუნიციპალიტეტის მერი, გიგა გაბელაია შესაბამისი სამსახურების წარმომადგენლებთან ერთად შექმნილ ვითარებას ადგილზე ეცნობა.
მერიაში შექმნილი მობილური ჯგუფები მუნიციპალიტეტის მასშტაბით აგრძელებს მონიტორინგს.
ამ დროისათვის ელექტროენერგია მიეწოდება აბონენტთა უმეტეს ნაწილს.
,,ენერგო-პრო ჯორჯიას“ აბაშის სერვისცენტრის თანამშრომლები უწყვეტად აგრძელებენ აღდგენით სამუშაოებს, მათ ეხმარებიან საგარეჯოს, ყვარლის, წნორისა და გორის სერვისცენტრის თანამშრომლები.
შექმნილი საგანგებო შტაბი 24 საათიან რეჟიმში აგრძელებს მუშაობას