აბაშაში “ცხელების ცენტრი” ამოქმედდა

აბაშის მუნიციპალიტეტში, ჯანდაცვის სამინისტროს მიერ შემუშავებული კორონავირუსის პრევენციის ღონისძიებების ფარგლებში, სს “ევექსის“ კლინიკების აბაშის კლინიკის ბაზაზე „ცხელების ცენტრი“ ამოქმედდა.
„ცხელების ცენტრი“ სამეგრელო-ზემო სვანეთის სახელმწიფო რწმუნებულის მოადგილემ, დავით ვერავამ და აბაშის მუნიციპალიტეტის მერმა, ლევან მაკალათიამ დაათვალიერეს. ხელისუფლების წარმომადგენლები „ევექსის“ აბაშის კლინიკის დირექტორს, სოსო ქოიავას და მედპერსონალს შეხვდნენ, ადგილზე გაეცვნენ არსებულ ვითარებას.
„ცხელების ცენტრში“ კორონავირუსის გავრცელების პრევენციის მიზნით, უსაფრთხოების განსაკუთრებული ზომები მოქმედებს, რომელიც მკაცრად კონტროლდება. ცენტრში 3 იზოლირებული პალატაა. დაწესებულებას მხოლოდ ის პაციენტები მიმართავენ, რომელთაც რესპირატორული ინფექციის სიმპტომები და ტემპერატურა აქვთ. დადგინდება ეპიდანამნეზი, რესპირატორული ინფექციის სიმპტომებისა და ტემპერატურის მქონე პაციენტებზე, 24-საათიანი დაკვირვება და ლაბორატორიული კვლევები ჩატარდება. სწორედ ამის შემდეგ გადაწყდება უნდა მოხდეს ამ პაციენტის სტაციონარში გადაყვანა თუ შემდგომი მონიტორინგი ბინაზე.
ცხელების ცენტრების შექმნის მიზანს, ახალ კორონავირუსთან დაკავშირებით შექმნილი ვითარების კიდევ უფრო უკეთ წარმართვა წარმოადგენს.