აბაშის მუნიციპალიტეტში სეზონური გრიპის საწინააღმდეგო ვაქცინაცია მიმდინარეობს

აბაშის მუნიციპალიტეტში სეზონური გრიპის საწინააღმდეგო ვაქცინაცია მიმდინარეობს.
21 ოქტომბრიდან, ქვეყნის მასშტაბით, სეზონური გრიპის საწინააღმდეგო ვაქცინაცია დაიწყო. ვაქცინაციის პროცესი აქტიურად მიმდინარეობს აბაშის მუნიციპალიტეტშიც.
საქართველომ სეზონური გრიპის საწინააღმდეგო ვაქცინაციისთვის ფრანგული წარმოების, სამკომპონენტიანი ვაქცინის (Vaxigrip) 200 000 დოზა შეიძინა. ვაქცინა ჯანდაცვის მსოფლიო ორგანიზაციის მიერ პრეკვალიფიცირებულ ვაქცინებს შორისაა.
გრიპის საწინააღმდეგო აცრა რეკომენდებულია 6 თვის ასაკიდან ყველა ადამიანისთვის, განსაკუთრებით კი იმ პირებისთვის, რომლებსაც გრიპის მძიმე მიმდინარეობისა და გართულებების მაღალი რისკი აქვთ. მათ შორის არიან: 60 წლის და უფროსი ასაკის პირები; ორსულები; 6 თვიდან 5 წლამდე ასაკის ბავშვები; ქრონიკული დაავადებების მქონე პირები; ონკოლოგიური პაციენტები; სამედიცინო პერსონალი; ხანდაზმულთა თავშესაფრებისა და პანსიონატების ბენეფიციარები და თანამშრომლები.
სეზონური გრიპის საწინააღმდეგო ვაქცინაცია უფასოა და სრულად ფინანსდება სახელმწიფოს მიერ.
აბაშის მუნიციპალიტეტში ვაქცინაციის მსურველებს შეუძლიათ მიმართონ შემდეგ სამედიცინო დაწესებულებებს:
თავისუფლების ქუჩა N13 – სს „საქართველოს კლინიკები“ – აბაშის კლინიკა;
ჩიქოვანის ქუჩა N15 – შპს „შანი“ – ნანა შენგელიას სახელობის სამედიცინო ცენტრი;
ასევე, აბაშის მუნიციპალიტეტის ყველა ადმინისტრაციული ერთეულის ამბულატორიას.
ვაქცინაციის მისაღებად მოქალაქეებმა თან უნდა იქონიონ პირადობის დამადასტურებელი დოკუმენტი.