ახალი სახელმწიფო პროგრამა ,,განახლებული რეგიონების“ ფარგლებში, აბაშის მუნიციპალიტეტში, თავისუფლების ქუჩაზე რკინიგზის სადგურის შენობის და მიმდებარე ბაქნების რეაბილიტაცია მიმდინარეობს.
მიმდინარე სამუშაოებს, აბაშის მუნიციპალიტეტის მერის მოვალეობის შემსრულებელი, ირაკლი პერტენავა და მერის მოადგილე ვახტანგ გაბელაია გაეცნენ.
აღნიშნული პროექტის ფარგლებში იცვლება რკინიგზის სადგურის ვიტრაჟები და კარ-ფანჯრები. იცვლება სადგურის ბაქნები, კიბის საფეხურები, სრულად განახლდება ფასადი, რეაბილიტაცია ჩაუტარდება რკინიგზაზე გადასასვლელ ხიდს, კეთილმოეწყობა სადგურის მიმდებარე ტერიტორია, ასევე მოეწყობა გამწვანება და პარკინგი.
აბაშის რკინიგზის სადგური, რომელიც ქალაქის ცენტრში მდებარეობს, 60-იან წლებშია აშენებული. შენობის მოუწესრიგებელი ინფრასტრუქტურა გადაადგილების პრობლემას ქმნიდა და საგრძნობლად ამახინჯებდა ქალაქის იერ-სახეს.
მსგავსი მასშტაბის სარეაბილიტაციო სამუშაოები, ქალაქის ერთ-ერთ გამორჩეულ ნაგებობას, რკინიგზის სადგურს, მანამდე არ ჩატარებია.
4-წლიანი უპრეცედენტო ახალი სახელმწიფო პროგრამა, „განახლებული რეგიონები“, საქართველოს 63 მუნიციპალიტეტს მოიცავს და ითვალისწინებს რეგიონების ურბანულ განახლებას, რაც მნიშვნელოვანი ობიექტების განვითარებას გულისხმობს.
