აბაშის მუნიციპალიტეტში, ქოლობნის ადმინისტრაციულ ერთეულში, ძლიერი წვიმების შედეგად მდინარე ცხენის წყალი ადიდდა.
ადიდებულმა მდინარემ სატბორე მეურნეობის მიმდებარე ტერიტორიაზე ჯებირი ჩამოშალა და მნიშვნელოვნად დააზიანა ადგილობრივი მნიშვნელობის საავტომობილო გზა. ნაპირის გამორეცხვა დატბორვის საფრთხეს უქმნის მოსახლეობას.
ადგილზე იმყოფებოდნენ აბაშის მუნიციპალიტეტის მერი, ლევან მაკალათია და შესაბამისი სამსახურების ხელმძღვანელები.
ამ დროისათვის მუნიციპალიტეტის ბიუჯეტის დაფინანსებით სტიქიის სალიკვიდაციო სამუშაოები მიმდინარეობს, მდინარის ჩამოშლილი ჯებირების გამაგრებით სამუშაოებში ჩართულია ტექნიკა.
