კონსტანტინე გამსახურდიას 128 წლის იუბილე

დღეს დიდი ქართველი მწერლის, საზოგადო მოღვაწის, საქართველოს მეცნიერებათა აკადემიის აკადემიკოსის, შოთა რუსთაველის სახელობის პრემიის ლაურეატის, კონსტანტინე გამსახურდიას დაბადების დღეა.

ტრადიციულ სახალხო ზეიმს, „კონსტანტინეობას“ აბაშის მუნიციპალიტეტი COVID-19-ის პანდემიის გამო განსხვავებულ ფორმატში შეხვდა, კონსტანტინე გამსახურდიას 128 წლის იუბილე მცირე ღონისძიებით აღინიშნა.

აბაშის მუნიციპალიტეტის მერმა, ლევან მაკალათიამ, საკრებულოს თავმჯდომარესთან მამუკა კვიტაშვილთან ერთად ყვავილებით შეამკო ზვიად გამსახურდიასა და მერაბ კოსტავას სახელობის პარკში არსებული კონსტანტინე გამსახურდიას ბიუსტი.

„15 მაისი განსაკუთრებით მნიშვნელოვანი თარიღია აბაშელთათვის, ამ დღეს მსოფლიოს უმცირესი მდინარის პირას დაიბადა მსოფლიო დონის კლასიკოსი მწერალი, ჩვენი სასიქადულო მამულიშვილი, ქართველი მესიტყვე, კონსტანტინე გამსახურდია. ადამიანის სახელი განისაზღვრება მისი მოღვაწეობისა და სამშობლოს წინაშე აღსრულებული ვალის მიხედვით, ამიტომაც არის კონსტანტინე გამსახურდიას სახელი უკვდავი. სასიხარულოა, რომ სოფელ ძველ აბაშაში, ფონდი „ქართუს“ მხარდაჭერით, მწერლის სახლ-მუზეუმის სრული რეაბილიტაცია და კომპლექსის მშენებლობა მიმდინარეობს. სულ მალე აბაშის მუნიციპალიტეტს შეემატება კულტურული სივრცე, რომელიც საშუალებას მისცემს მომავალ თაობებს, სათანადო პატივი მიაგონ ღირსეულ წინაპარს”,-აღნიშნა ლევან მაკალათიამ.

დიდოსტატის ცხოვრებასა და შემოქმედებაზე ისაუბრა აბაშის მუნიციპალიტეტის რესურსცენტრის უფროსმა, მერაბ მიგინეიშვილმა. პატარა დეკლამატორებმა წაიკითხეს კონსტანტინე გამსახურდიასადმი მიძღვნილი ლექსები და მწერლის ჩანაწერები.
კულტურისა და ხელოვნების განვითარების ცენტრის ანსამბლ „ჰარირას“ მიერ შესრულდა ქართული ხალხური სიმღერები.
ღონისძიებას ესწრებოდნენ მერიისა და საკრებულოს სხვადასხვა სამსახურის წარმომადგენლები.