აბაშის მუნიციპალიტეტში სტიქიის შედეგების აღმოსაფხვრელად შესაბამისი ღონისძიებების განხორციელება დაიწყო. ამასთან დაკავშირებით, აბაშის მუნიციპალიტეტის მერი, გიგა გაბელაია, პირველ მოადგილესთან, ირაკლი პერტენავასთან და მოადგილესთან, გიგა ჯვარელიასთან ერთად ზარალის დამდგენი ჯგუფის წევრებს, ადმინისტრაციულ ერთეულებში მერის წარმომადგენლებს, შესაბამისი სამსახურების თანამშრომლებს შეხვდა.
სამუშაო შეხვედრაზე სტიქიის შედეგების აღმოსაფხვრელად მიმდინარე ღონისძიებები განიხილეს.
სტიქიურ მოვლენებთან დაკავშირებით ზარალის დამდგენი სამუშაო ჯგუფის წევრები ადმინისტრაციულო ერთეულებში 24 საათიან რეჟიმში მუშაობდნენ.
შტორმული ქარის შედეგად მნიშვნელოვანი ზარალი მიადგა მუნიციპალიტეტში შემავალი 16 ადმინისტრაციული ერთეულის მოსახლეობის საცხოვრებელ სახლებს. კერძოდ, დაზიანებულია 847 საცხოვრებელი სახლის სახურავი, ასევე დაზიანდა 4 მრავალბინიანი საცხოვრებელი სახლის სახურავი, აღდგენას არ ექვემდებარება 100-მდე განათების ბოძი.
„საქართველოს პრემიერ-მინისტრის გადაწყვეტილების შესაბამისად, ცენტრალური ხელისუფლების მხარდაჭერით მაქსიმალურად მცირე დროში მოხდება სტიქიისგან მიყენებული ზიანის ლიკვიდირება, გამოყოფილია თანხები და ზარალი იქნება ანაზღაურებული.
მერიის სარეზერვო ფონდის ბიუჯეტიდან, სტიქიის შედეგად დაზარალებულ სოციალურად დაუცველ კერძო სახლების მესაკუთრეებზე ფულადი კომპენსაცია გაიცემა.
მინდა მადლობა გადავუხადო ყველა სამსახურს, თითოეულ ადამიანს, ვინც აქტიურად იყო ჩართული სტიქიის სალიკვიდაციო სამუშაოებში“, -განაცხადა შეხვედრაზე გიგა გაბელაიამ.
სტიქიურ მოვლენებთან დაკავშირებით შექმნილი ზარალის დამდგენი სამუშაო ჯგუფის სხდომა უკვე გაიმართა. სტიქიის შედეგად დაზარალებულ ოჯახებისთვის კომპენსაციის გაცემა უახლოეს დღეებში დაიწყება.
