აბაშის მუნიციპალიტეტში, სოფელ მაცხოვრისკარის ახალი სკოლის მშენებლობა დასრულების ეტაპზეა. ამჟამად მიმდინარეობს სკოლის შიდა სარემონტო და გარე პერიმეტრის მოწყობის სამუშაოები.
ახალი სკოლის მშენებლობის მიმდინარეობას აბაშის მუნიციპალიტეტის მერი, ლევან მაკალათია, სამეგრელო-ზემო სვანეთის სახელმწიფო რწმუნებული მალხაზ თორია და რწმუნებულის მოადგილე, დავით ვერავა გაეცნენ.
60 მოსწავლეზე გათვლილი სკოლა საერთაშორისო სტანდარტების შესაბამისად ეწყობა, ახალი ინვენტარითა და ტექნიკით აღიჭურვება, აქვს კლას-კაბინეტები, ლაბორატორია, ბიბლიოთეკა, ექიმის კაბინეტი, ცენტრალიზებული გათბობა, კომპიუტერული კლასი, ტექნიკური ოთახი, ბუფეტი-სასადილო. სკოლა სრულად ადაპტირებულია შშმ პირთათვის. სპორტული მოედანი მოწყობილია საერთაშორისო სტანდარტების შესაბამისად, გამოყენებულია ეკოლოგიურად სუფთა ინტერიერის საღებავი და მასალები.
პროექტი საქართველოს მუნიციპალური განვითარების ფონდიდან 1 112 003 ლარით ფინანსდება. სამუშაოებს ასრულებს სამშენებლო კომპანია შპს „ჯავა“.
